يا سلة، خلّوا لنا خيار البقاء على لوحة التحكم القديمة

من أكبر الأخطاء اللي أشوف إن سلة وقعت فيها هو إجبار التجار على الانتقال للوحة الجديدة، سواء بتغيير اللوحة بالكامل أو بربط بعض الخدمات فيها. إحنا بدأنا مع سلة وتعلّمنا شغلنا على اللوحة القديمة، وصارت جزء من يومنا في إدارة المتجر.

اللي كان يميّز اللوحة القديمة هو بساطتها. تفتحها وتعرف وين تروح. تبي تعدّل طلب أو تتابع حالته أو تسوي إجراء؟ تعرف مكانه وتخلصه بسرعة. تصميمها خفيف وواضح، وهذا فرق كبير للتاجر اللي يفتح اللوحة كل يوم ويبي ينجز شغله.

في اللوحة الجديدة، كثرة الخيارات وتفرّع القوائم صعّبت علينا حتى إدارة الطلبات. الإجراء اللي كنا نسويه بسرعة صار ياخذ وقت عشان نلقى مكانه. ومع ضغط الشغل اليومي، التأقلم مع كل هالتغييرات ممكن ياخذ منا وقت طويل. واستمرار الانتقال الإجباري ممكن يخلي بعض التجار اللي لهم سنين مع سلة يعيدون النظر في استمرارهم معها.

طلبنا واضح يا سلة. خلّوا الانتقال للوحة الجديدة اختياري، وخلّوا اللي يبي يكمل على اللوحة القديمة يقدر يدير متجره ويستخدم خدماته من خلالها.

نتمنى تاخذون هالاقتراح على محمل الجد وتسمعون من التجار اللي يستخدمون اللوحة يوميًا. بساطة اللوحة القديمة كانت من أهم الأشياء اللي حبّبَتنا في سلة وخلّتنا نرتاح في الشغل عليها.

وجزاكم الله خير.